Nye titlar i Vest-Telemark VGS si samling. Veke 50.

Alle titlar kan lånast på Tokke bibliotek viss ikkje anna er nemnt.

NB! Dette er berre dei nye titlane som skulebibliotekaren kjøper inn, og det er for det meste fagbøker og dokumentarar. Men hugs at Tokke bibliotek òg får inn ei røys nye, spanande bøker, CD-ar og filmar kvar veke. Mellom anna all den nyaste skjønnlitteraturen, frå kjærleiksromanar til krim.
Ta deg ein tur og sjekk ut tilbodet, då vel!

OBS: Grunna etterslep på registrering og bokomtaler vil det ei tid bli publisert lister over titlar som blei innkjøpte tidlegare i år. Etter kvart vil listene få større aktualitet.

M is for magic. Neil Gaiman. Bloomsbury, 2008

Elleve noveller på engelsk for deg som likar deg i kryssingspunktet mellom det nifse og det komiske, det fortryllande og det daglegdagse, det tøvete og det alvorlege.
Her støyter du mellom andre på eit morbid troll-i-eske som spøkjer for sine tidlegare eigarar, ein villkatt som kjemper natta igjennom for å beskytte familien han har adoptert som sin og ein gut, oppvaksen på kyrkjegard, som erfarer at livet blant dei daude er mykje meir ukomplisert enn livet blant dei levande. Boka har stor skrift og eit lettlese språk.

The Wolves in the walls. Neil Gaiman. Bloomsbury, 2007

Kva for snikande, skumle lydar er det som kjem frå veggane i huset der Lucy bur? -"Rottar, mus, flaggermus", seier dei andre i familien. Men Lucy er heilt viss på at det er vaskeekte, ulande ulvar. Sjølvsagt er det ingen som trur på det ho seier. Men ein dag får dei sjå... Og det skal syne seg at kampen mot ulvane ikkje er slutten, men byrjinga på ei historie.
-Ei klaustrofobisk, fæl, pussig og småartig ei. Boka er gjennomillustrert av Dave McKeans umiskjennelege strekar og bilete. Det fylgjer med ein CD der teksten er innlesen av forfattaren sjølv. Engelsk tekst.

Instructions. Neil Gaiman. Bloomsbury, 2010

Biletbok på engelsk med flotte illustrasjonar og tankevekkande tekst med få, men gode ord. Du får ikkje vete kva du leitar etter. Men kvar side gjev deg ein ny instruks om kva du må gjere på din veg gjennom ei eventyrleg
-av og til grusom- verd for til slutt å kome trygt heim: Viss eit vesen fortel deg at det svelt, gje det mat. Viss eit vesen fortel deg at det er skite, vask det. Viss eit vesen skrik til deg at det har det vondt, døyv smerta om du kan. Stol på ulvane, men ikkje fortel dei kor du skal. Og aldri mist håpet.

Kirkegårdsboken. Neil Gaiman. Schibsted, 2010

Nobody Owens veks opp på ein kyrkjegard. Der blir han oppseda av spøkjelse og daudingar, og ironisk nok har dei gode overlevingstriks å lære bort. Det kan han trenge, for i dei levande si verd -som han snart skal vandre ut i- bur Jack. Og Jack har teke livet av heile familien til Nobody. No er han på leiting etter sistemann... Boka har blitt kalla spøkjelsesvarianten av Jungelboken!

The Borrible triology. Michael de Larrabeiti. Tor, 2003

Boka består av tre bøker: The Borribles, The Borribles go for broke og The Borribles: Across the dark metropolis. Bøkene har vore omstridde grunna valdsskildringar og utstrekt bruk av bannskap, men er no tekne inn i varmen. The Borribles var opphavleg ungar som rømde heimafrå. Dei har spisse øyro og har utsjånad som aldri eldast. Det vil seie, så lenge dei greier å unngå å bli tekne av The Woolies, eit slags politi som meiner at The Borribles trugar lov og orden. For the Borribles er anti-autoritære og anti-materialistiske. Dei har ikkje pengar, men stel alt dei treng. Og dei vil heller stå opp for ein kamerat enn å rette seg etter påbod og forbod. Viss The Woolies får tak i ein Borrible klypper dei øyro og aldringsprosessen tek til att. Dette er ei skjebne verre enn dauden for ein Borrible, som då må leve eit kjedeleg vaksenliv utan eventyr og villskap, der materialismen rår. Difor må ein Borrible alltid gøyme øyro under ei ullhuve. Det er ingen som veit kor lenge ein Borrible kan leve. Men dei kan vere overalt i større byar.
I denne boka er det The Borribles i Londons snuskete bydelar me blir kjende med. Engelsk tekst.

The traveller. John Twelve Hawks. Corgi, 2006

Denne boka har blitt kalla "Den nye Da Vinci-koden" og blir samanlikna med klassikarar som 1984 av George Orwell og filmen The Matrix. Gabriel og Michael bur i Los Angeles. Dei er såkalla vandrarar, det vil seie at dei har evne til å forflytte seg ved tankekraft. Evna har dei arva frå far sin, men dei er ikkje klare over det sjølv. Dei har i staden blitt opplærte til å leve mest mogleg usynleg og anonymt i det gjennom-overvaka samfunnet. Berre slik kan dei få vere i fred for fienden, dei mektige leigesoldatane Tabula som lever utanfor Systemet. Men dei er ikkje så usynlege som dei trur. Og no er fienden etter dei. Systera Maya er 26 år og bur i London. Sjølv stammar ho frå ei krigargruppe som har som oppdrag å beskytte vandrarane, og ho er trena i ekstrem slåssing og overlevingsteknikk. Hittil har ho prøva å leve så normalt ho kan, men no får ho beskjed av faren om at det er hennar ansvar å redde brørne frå ein sikker daud. Dette er fyrste bok i trilogien The fourth realm. Engelsk tekst.

The dark river. John Twelve Hawks. Corgi, 2007

Dette er andre bok i trilogien The fourth realm. Verda blir styrt av frykt. Overalt kor du ferdast er det nokon som fylgjer med deg. Målet er å avsløre feila dine, løyndomane dine, sanninga om deg. Ikkje den ekte sanninga, men den sanninga overvakarane er ute etter for å få deg i garnet. Og kvar dag må du ofre enno ein liten fridom det ikkje er mogleg å vinne attende. Gabriel Corrigan er ein av dei som kjempar i mot Systemet. Men Systemet seier at du ikkje får eit val om å delta i det. Og dei som prøvar å snike seg unna skal forfylgjast og finnast koste kva det koste vil. Den livsfarlege jakta etter Gabriel går gjennom mørke undergrunnstunnelar i London og New York, til skjulte ruinbyar under Berlin og Roma, til fjerne utpostar i Afrika, der ein myteomspunnen skatt skal vere gøymt... Engelsk tekst.

Utvalgt. En House of Night-roman. (3)

P.C. og Kristin Cast. Cappelen Damm, 2010

Livet er ikkje lett for vampyrlærlingen Zoey Redbird. Midt i joleferien frå vampyrskulen House of Night flokar det meste seg til. Besteveninna Stevie Rae er udaud og treng hjelp. Andre vener syner seg å vere svikefulle. Tre kjærastar er sjalu på ei og same tid. Og så er det denne blodtyrsten som stadig aukar på... Dette kunne vore ille nok, men i tillegg blir to vampyrar funne daude, og Zoey sin teori er at Troens folk står bak. Kanskje er det berre hennar verste fiendar som kan kome Zoey til unnsetning no... Blodig grøss!

Utemmet. En House of Night-roman. (4)  

P.C og Kristin Cast. Cappelen Damm, 2010

Zoey har på stutt tid blitt venelaus og kjærastlaus. Det er ingen lett overgang når ho for litt sidan hadde mange vener og heile tre kjærastar. No har ho berre to vener att, og den eine er udaud og den andre umerkt. Så erklærer Neferet krig mot menneska, og ingen vil høyre på Zoey når ho hevdar at dette er galskap. Men verre skal det bli: for eldgamal vondskap blir vekt til live på House of Night, og forferdelege løyndomar blir avslørte... Det blir både ville og farlege tider for heltinna Zoey Redbird... Fantasy for den blodtyrste!

 Nærmere. Tunneler (4) Roderick Gordon og Brian Williams. Cappelen Damm, 2010

I sentrum av jorda finst det ei verd ingen veit at eksisterer. Der inne trur Will at han kan vere trygg. Men fienden Styx er innstilt på å fylgje etter han til verdas ende. Og til enden av alle tenkjelege verder. Og nett no er Styx rett bak Will... Oppe på jorda bur Drake seg til å angripe Styxane ovanifrå. Viss den listige planen hans ikkje lukkast er det ute med Will! Heseblesane fantasy! Dette er fjerde bok i Tunneler-serien.

  

Ulveøya. Spis eller bli spist... Demonata 8. Darren Shan. Cappelen Damm, 2010

Skyggen formørkar Demonata-universet med sin reindyrka vondskap. No samlar han demonar til ein mektig hær som skal leggje menneskeverda i grus. Og Grubbs Grady og venene blir truga av varulvar. Dei er på frifot, og dei er svoltne... Ein av venene blir omskapa til varulv og er fortapt. Og kva med Grubbs? Kva er han? Varulv eller trollmannen som skal leie og vinne kampen mot Demonata? Varulven inni han byrjar glippe med augo...

  

Ever -For alltid. De udødelige. (1) Alyson Noël. Kagge, 2010

16 år gamle Ever er den einaste som overlever bilulukka som tek livet av foreldra og veslesøystera. Etter ulukka blir ho synsk og får evna til lese folk sine tankar og sjå auraen deira. Ho treng berre røre ved dei, så kan ho sjå heile livshistoria tydelegare enn dei kan sjølve. Dei nye evnene er vanskelege og slitsame å hanskast med, og for å beskytte seg sjølv blir ho folkesky. På den nye skulen synest alle ho er ein raring. Men raringen Ever fattar etter kvart interesse for ein gut. Damen Auguste er nydeleg, merkeleg og rik. Ever forstår lite av han, men blir likevel hjelpelaust lokka mot han. Og det varar ikkje lenge før den altoverskuggande forelskinga er eit faktum. Spanande bok for deg som lika Twilight-serien.

Bokmål-nynorsk ordbok. Knut Lindh. Cappelen Damm, 2010.

Mange med nærare tilhøve til bokmål enn nynorsk har berre delvis kunna hjelpe seg med ei tradisjonell nynorsk ordliste. For kva gjer ein når ein kjenner ordet på bokmål, men ikkje greier kome på eit tilsvarande nynorskord ein kan slå opp på??
I denne boka kan du slå opp på bokmålsord og få forslag om høvelege nynorske ord og uttrykksmåtar. Ordboka er spesielt tilpassa elevar i vidaregåande skule som har nynorsk som sidemål. Boka inneheld over 31 000 oppslagsord og har detaljerte opplysingar om bøying illustrert med mange døme. Her finn du òg minigramatikk. Nynorsk har mange valfrie former, noko som kan forvanske innlæringa for bokmålsbrukarar. Difor har ein i denne boka valt å utelate ein del former og bøyingar.

Studieteknikk. De 10 husk-reglene. Jostein Iversen. Læreboka forlag.

Eit lite hefte som oppsummerer og forklarar 10 grunnreglar for god studieteknikk. Viss du legg deg til ein vane med å fylgje desse vil du faktisk starte eksamensførebuingane fyrste skuledag, og dermed stille betre rusta enn dei fleste når D-dagen er der. Og det beste av alt er at du kjem til å hugse stoffet etterpå!

Å lese dette vesle heftet kan spare deg for mykje strev i framtida!

Hjernetrim. 202 oppgaver som gjør deg smartere.

Anne Lene Johnsen. Kagge, 2008

Lyst til å bli smartare? Forfattaren Anne Lene Johnsen meiner det er viktig å trene hjernen dagleg på same måten som kroppen. Då vil du nemleg merke at du er langt smartare enn du trur. Difor har ho i denne boka samla hjernenøtter og logikkoppgåver, sudoku, kakuro, kunnskapsspørsmål, gåter og triks

i dagsdoser. Kast deg over ei dose om dagen og kjenn hjernen vekse!

DVD: Menneskets store vandring. 2008

Bli med på ei spanande ferd gjennom historia om mennesket! Då dei fyrste individa av Homo Sapiens reiste ut frå Aust-Afrika var dei ikkje den einaste menneskelege arten som fanst, men dei var den einaste som hadde ei framtid. Kvifor? Og korleis har utviklinga av vår art gjort oss til dei me er i dag? Filmen gjer bruk av den nyaste forskinga innan genteknologi og arkeologi og syner korleis mennesket har utvikla seg gradvis, både kroppsleg og mentalt, i vekselverknad med omgjevnadane gjennom 70 000 år.

DVD: Yellowstone. 2008

Yellowstone er ein av dei største nasjonalparkane i verda, med villmark av sjeldan sort. Her er viddene uendelege, skogane mørke og djupe og fjella himmelhøge. Parken rommar òg varme kjelder, og under bakken slumrar ein gigantisk vulkan. I dette vakre, men farefylte landskapet kjempar bisonflokkar, grizzlybjørnar og andre utryddingstruga dyr mot tøffe livsvilkår. I denne filmen fylgjer me kampen for tilvêret gjennom tre årstider.

DVD: Capitalism. A love story. 2009

Michael Moore analyserer Amerika sitt tilhøve til kapitalismen i kjend stil, med ei blanding av hardtslåande argumentasjon, sarkasme og humor. Kva er prisen landet må betale? Jobbar, heimar og sparepengar, alt går med i dragsuget om naudsynt. Har den amerikanske draumen blitt til eit mareritt? Me får vere med Moore inn i heimane til vanlege folk. Dei kan fortelje om liv som har blitt snudde fullstendig på hovudet.

DVD: Memento mori. Husk at du skal dø. 2008

Kva? Døy, eg? Er det ikkje folk på sjukehus som døyr? Dauden er noko me fornektar lengst mogleg og snakkar minst mogleg om. Og det er truleg klokt å halde hovudfokus på livet om me kan velje. Men nokre gongar blir me tvinga til å sjå dauden i augo. Hans Petter er 66 år og veit han skal døy av kreft innan stutt tid. No må han henge i for at kona Eva skal få det greiast mogleg etter han er borte. Han snekrar og fiksar og ordnar. Men Eva vil heller at dei to skal kose seg i lag den tida som er att. Parallelt med Hans Petter si historie får me ta del i kvardagen på Svanholm gravferdsbyrå i Trondheim.
Her er dauden fast husvenn på godt og vondt. Og hit må Hans Petter òg finne vegen.

Nye titlar i Vest-Telemark VGS si samling. Veke 49.

Alle titlar kan lånast på Tokke bibliotek viss ikkje anna er nemnt.

NB! Dette er berre dei nye titlane som skulebibliotekaren kjøper inn, og det er for det meste fagbøker og dokumentarar. Men hugs at Tokke bibliotek òg får inn ei røys nye, spanande bøker, CD-ar og filmar kvar veke. Mellom anna all den nyaste skjønnlitteraturen, frå kjærleiksromanar til krim.
Ta deg ein tur og sjekk ut tilbodet, då vel!

OBS: Grunna etterslep på registrering og bokomtaler vil det ei tid bli publisert lister over titlar som blei innkjøpte tidlegare i år. Etter kvart vil listene få større aktualitet.

Den forsvunne diamanten. Historien om fotballens mørke side. Lars Backe Madsen og Jens M. Johansson. Tiden, 2008.

Med utgangspunkt i den kjende John Obi Mikel-saka tek boka føre seg handelen med mindreårige afrikanske gutar i fotballverda. Der er det nemleg astronomiske pengesummar i omløp, noko som gjer eit par gode driblebein til handelsvare på høgt nivå. Gutane blir lokka til Europa med løfte om fotballkarriere og rikdom.
Men innfrir dei ikkje forventningane blir dei "dumpa," og mange finn ein seinare att på gata i europeiske storbyar. Avsløringane me kan lese om i boka involverer dei største klubbane i Europa, som Arsenal, Manchester United og Barcelona.

Æresdrap. Menn som drep kvinner. Ayse Onal. Samlaget, 2008.

I Midt-Austen er æresdrap eit velkjend fenomen, og sakene i media er mange. Det har òg blitt skrive tallause artiklar, mastergradsoppgåver og bøker om dette kontroversielle temaet. Det spesielle med denne boka er at drapsmennene sjølv kjem til orde. Forfattaren har intervjua menn som har drepe mødrene, systrene og døtrene sine for om mogleg å kome nærare ei forståing av kva som ligg bak slike grufulle handlingar. Finst det grenser for kor langt ein kan gå for æra si skuld? I boka får me gripande personlege historier sett inn i ei objektiv, historisk ramme. Forfattaren har arbeidd med politikk og kriminalitet i Midt-Austen i 20 år.

Metode og oppgaveskriving for studenter. Olav Dalland.
Gyldendal akademisk, 2007.

Denne boka tek opp praktiske utfordringar i samband med oppgåveskriving og gjev ei innføring i samfunnsvitskapleg metodikk. Korleis samle inn data? Korleis gjennomføre undersøkingar ved hjelp av såkalla kvalitativt intervju og observasjon? Ein får òg råd om korleis ein kjem seg gjennom sjølve skriveprosessen, med utforming av problemstilling, oppbygging av teksten og presentasjonsform.
Denne utgåva er tilpassa dei nye krava som har kome til bacheloroppgåva på høgare utdanning. Boka kan vere grei å kikke i for dei som tenkjer seg inn på høgskular og universitet etter vidaregåande og vil førebu seg til krava til oppgåveskriving som gjeld der, og på fleire andre arenaer i samfunnet.

ORKAN! Enorme naturkrefter. Anne Rooney. Estess, 2008.

Lyst til å skjøne korleis orkanar, syklonar og tyfonar oppstår? Og kva er eigentleg skilnaden mellom desse? Denne boka fortel korleis dei sterkaste vindane oppstår langt ute på havet og om alt rotet dei steller i stand når dei treffer land. Ein får lære om naturkreftene frå ein naturvitskapeleg ståstad, men boka rommar òg historier om verkelege hendingar, som til dømes tyfonen som ramma Bangladesh i 1970 og tok livet av ein halv million menneske. Lettlesen bok med mykje oversiktleg informasjon og mange bilete.

TSUNAMI! Enorme naturkrefter. Anne Rooney. Estess, 2008.

Tsunamiar er enorme flodbylgjer som oppstår som konsekvens av jordskjelv, ras og vulkanutbrot. Som me alle veit kan desse skape katastrofar av ufattelege dimensjonar. I denne boka lærer ein om geologien og fysikken som ligg bak dette naturfenomenet, men òg om konsekvensane for menneske og samfunn der tsunamien rammar. Mellom anna kan me lese om tsunamien som i desember 2004 tok 300 000 menneskeliv i Asia. Lettlesen bok med mykje oversiktleg informasjon og mange bilete.

OVERSVØMMELSE! Enorme naturkrefter. Anita Ganeri. Estess, 2008.

Kva er flaum, korleis oppstår flaum og på kva måtar skapar fløymande vatn problem for oss menneske? Finst det forskjellige slag flaum? Boka forklarar alt dette, samt fortel historia om verkelege flaumar verda har vore utsett for. I 1931, til dømes, drukna fem millionar kinesarar då vatnet steig og tok sine eigne vegar. Lettlesen bok med mykje oversiktleg informasjon og mange bilete.

Gigantlastebiler. De sterkeste, raskeste og kraftigste kjøretøyene som finnes. Damm, 2008.

For deg som likar motor og mekking er boka triveleg tidsfordriv. Rett nok er barn målgruppa for boka, men det er ikkje fritt for at ungdom og vaksne med interesse for ting som durar òg kan lære noko nytt. Om ikkje anna er boka full av tøffe og detaljerte bilete, og her er mykje imponerande å sjå! Enorme, drønnande doningar fyller boka frå byrjing til ende.

Monstermaskiner. Verdens største, tyngste og villeste kjøretøy.

Damm, 2007.

Boka er av same slag som den ovanfor. Her får du stilige bilete av dei største og tyngste køyretøya som finst, samt fakta om kvart køyretøy. Her er ingenting for stort, ingenting for ekstremt! Denne boka er artig å sjå i for alle som har evna til å late seg imponere av teknikkens vedunder, ein treng ikkje vere bilinteressert!

Fly. Ian Graham. Estess, 2008.

Er du ein av dei mange som ikkje kan fatte og begripe korleis ein metallkoloss kan lette og flyge i lufta? Då treng du ikkje lure meir. Denne boka gjev deg nemleg svaret på alt som har med fly og flyging å gjere, på eit enkelt og lettfatteleg nivå med mange bilete. -Korleis fungerer ein jetmotor? Korleis styrer piloten flyet? Kva er dei til, desse flapsane og flopsane på vengjene som underheld og skremmer oss med si gåtefulle rørsle der me sit og glor ut flyvindauget? Korleis funkar eit helikopter?
You name it: svaret finn du her!

Anleggsmaskiner. Terry Jennings. Estess, 2008.

Korleis greier ei gravemaskin å lyfte så tungt? Kva er ei pelemaskin? Korleis verkar eit trykkluftbor? Korleis kan ei heisekran heise opp seg sjølv? Kva for maskiner nyttast til tunnelbygging? Kva heiter maskinene som sperrar vegen for oss når det er vegarbeid på gang? Denne boka forklarar alt dette på ein enkel måte, med mange bilete og stor skrift.

Utrykningskjøretøyer. Ian Graham. Estess, 2008.

Her får du vete korleis eit brannslokkingsfly verkar, lære om spesialkøyretøya dei nyttar på flyplassane, korleis redningsbåtar er konstruerte og korleis dei arbeider, kva luftambulanse er, sjå kva mystisk utstyr dei har i politibilane osb. Velkomen inn i ei fascinerande verd av elektronikk og spesialutvikla hjelpemiddel! Boka har enkel tekst og mange store bilete.



Dette bør du vite om piercing og tatovering. Paul Mason.
Estess, 2004.

Denne boka er ein del av serien "Dette bør du vite om..." som freistar avsløre myter og misforståingar om tema som mange har meiningar om, men få veit særleg mykje om. Og som kanskje er vanskelege å snakke om. Her kan du lære om dei forskjellige metodane som nyttast ved piercing og tatovering, og ikkje minst om kva som skjer om arbeidet ikkje blir rett utført. Boka tek òg føre seg historia bak og ikkje minst dei vekslande haldningane i samfunnet til kroppspynt som dette. Teksten er lett å forstå og er krydra med fargefotografi.

Uteliv. David Åleskjær og Jan Luneborg. Humanist, 2009.

Gjennom denne boka kan du få deg nokre vekkjarar om korleis du ser på deg sjølv og andre. Her får du nemleg vere med på ei vandring under bruene og til benkane kring Oslo S. Kven er desse menneska som held til her, desse unge og gamle, stygge og vakre med bøygd hovud og skjelvande kne? Og ikkje minst: korleis hamna dei her, korleis blei livet slik eit slit? I boka blir du kjend med dei, og med menneska som går forbi utan å sjå dei.

Aspergere fra A- og nesten til Å. Miljøterapi i forhold til voksne personer med Aspergers syndrom. Jennipher C. Bingham. Licentia, 2010.

Målet med denne boka er å gje eit innblikk i verda til vaksne menneske med Aspergers. Korleis ser røynda ut for dei, korleis tenkjer dei og opplever ting? Dette kan vere interessant lesnad for alle som omgåast aspergerar, anten som vener og familie eller som profesjonelle. For dei som tenkjer seg inn i eit helse- eller sosialfagleg yrke gjev boka ei systematisk framstilling av egostyrkande sjukepleie og dekkjer dei fleste hovudområde innan miljøterapi for aspergarar. Det er spesielt lagt vekt på kor viktig det er å sjå kvart unike menneske for seg og på dei praktiske konsekvensane av syndromet.

Du gjør bare sånn! Bruk av digitale verktøy sammen med barna.

Nina Bølgan. Fagbokforlaget, 2009.

Korleis kan ein integrere digitale verktøy i det pedagogiske arbeidet i barnehagen? Boka vender seg til ferskingane blant barnehagepersonalet som kanskje har begrensa erfaring med å bruke datamaskin, kamera og andre digitale verktøy, men som likevel må oppfylle intensjonane i rammeplanen. Sidan ungane er både nyfikne og kreative kan dette bli ein morosam og gjevande jobb! Og med denne boka får du både fagleg grunngjeving og praktisk hjelp til å forstå og bruke moglegheitene til læring som ligg i dei digitale hjelpemidla. Forfattaren er fyrstelektor i pedagogikk ved førskulelærarutdanninga ved Høgskulen i Oslo.

Bare en liten visitt i helvete. Rolf Bergsten. Snøfugl, 2008.

Rolf Bergsten frå Hakadal blei fyrst avvist som frivillig i Finland sin krig mot russarane, og vende seg då til den tyske hæren. I denne sjølvbiografiske boka ser han attende på ei sterk livshistorie med liv og død, svelt og vonløyse. Han fortel om kampane i grensetraktene mellom Finland og Russland, med historiar frå oppveksten som bakteppe. Fleire av venene hans døydde på slagmarka. Rolf kom attende til Noreg, kor han blei dømt for landssvik.

DVD: The road. 2009

Filmen er basert på en roman med same namn (på norsk: Veien) av Cormack Mc Carthty. Rollene blir spelte av mellom andre Viggo Mortensen, Charlize Theron og Robert Duvall. Handlinga er like gripande som enkel: Ein far og son vandrar einsame gjennom eit forkulla, fullstendig livlaust månelandskap. Kulda er uuthaldeleg og snøen som fell over dei er ikkje kvit, men grå. Dei går og går, men er på veg ein plass der kanskje ingen ventar på dei. Kanskje ikkje ein gong ei framtid. Det einaste dei har er kleda sine, ei handlevogn med mat og ein pistol. Og kvarandre. Skal dei orke dette slitet? Kvifor ikkje berre leggje seg ned og døy? Men kan ein far ta eit slikt val for sonen sin?

DVD: Life. 2009

Storslagen naturdokumentar på 4 DVD-ar laga av BBC. Her får du alt du reknar med frå den kanten: Bergtakande bilete, kaskadar av fargar, forbløffande scener.
-Og Sir David Attenborough. Det spesielle med denne filmen er at kameraet kjem nærare enn det nokon gong har gjort, og mykje av stoffet er filma for aller fyrste gong. Me får sjå kva for ekstreme utfordringar livet tilpassar seg og kjem langt innunder huda på livsunderet. Utstyret som er bruka er sjølvsagt det ypparste som finst å få.
Og produktet blir deretter: Dyre- og planteriket kjem rakt inn i stova di med alt sitt mirakuløse mangfold. Topp underhaldning og ny kunnskap hand i hand!

DVD: Roald Amundsens sydpolsferd 1910-1912. 2010

Denne filmen inneheld Roald Amundsen sine originale filmopptak frå ekspedisjonen der han oppdaga sørpolpunktet. Filmopptaka er med i UNESCO sitt register Verdens hukommelse, og der er det svært få filmar som har fått innpass. Materialet er restaurert og blir her synt i fire ulike versjonar, med nyinnspela og spesialkomponert musikk.
DVD-en inneheld òg intervju med polfararane Liv Arnesen og Børge Ousland, samt filmfotograf Hallgrim Ødegård. Som om ikkje dette er nok fylgjer det med ei rikhaldig bok som set det visuelle materialet inn i ein historisk samanheng.

DVD: Maradona. 2008

Dette er filmen om mannen mange meiner er verdas beste fotballspelar gjennom tidene. Diego Maradona er ein mangefasettert person frå enkle kår, som har dribla seg opp til eit eventyrleg liv og ein status som levande legende. Han har motteke ovasjonar både for fotballspelet og samfunnsengasjementet sitt. Han har til tider levd hardt, og misbruk av narkotika og andre nytelsesmiddel er ein del av hans historie. I denne dokumentarfilmen kjem me tett inn på stjerna, og som ein bonus får me òg bli kjende med ein annan helt, nemleg filmregissøren Emir Kusturica. Manu Chao og Sex Pistols sørgjer for musikken.

DVD: Billy Elliot. 2000

Ei hjartevarm historie om den 11-årige Billy som veks opp i eit rått og maskulint gruvearbeidarmiljø. Der blir det forventa at han skal drive med boksing. -Om han skal bli eit skikkeleg mannfolk, altså. Det er berre det at Billy har meir lyst til å danse ballett! Han snublar tilfeldig over Mrs Wilkinsons ballettundervising og blir frelst i same stund. Det syner seg òg at han har eit helt spesielt talent! I byrjinga må han halde den nye hobbyen hemmeleg for ikkje å bli mobba av kameratane og støytt bort av faren. Han får ein stri tørn med å bli respektert som den han er, og livet blir aldri meir det same.
Dette er ei spesialutgåve med mykje ekstramateriale.

DVD: Broom. 2009

Har du bildilla? Då har du kanskje sett TV-serien Broom på TV2? På denne DVD-en er høgdepunkta frå fyrste sesong samla, pluss rikhaldig bonusmateriale. Her blir raske bilar testa, og du får forbrukarråd om ulike bilmodellar osb. Programleiar Jan Erik Larssen held rattet under kontroll gjennom svingane.

"Berre prøv dykk, gutar!" -Nynorsk dreg meir damer!

Lurar du på kvifor du jamt har eit kobbel kvinnfolk som klamrar seg til deg når du syner deg blant bokmålsbrukarar? Are Kalvø har forklaringa: Nynorskfolk og dialektbrukarar har til alle tider gjort det skarpt blant damene. Ja, blant begge kjønn, faktisk. Så skarpt at dei eigentleg berre kan halde kjeft og gjere ingenting, men likevel bli oppfatta som eksotiske, kloke og mandige. Høyr dette kåseriet og bli meir medviten om ditt sterkaste kort i det skumle, sosiale spelet der ute! Men OBS! Kalvø er på ingen måte partisk og åtvarar òg om fallgruvene! Så spiss øyro!




Som du skjønar er Kalvø ein vismann det kan vere nyttig å lytte til for den som vil fram i verda.
Fekk du lyst til å lese meir av herren kan ditt lokale bibliotek garantert hjelpe deg!
Her ser du nokre av bøkene hans:

Men fjernkontrollen min får du aldri. (1997)
Kalvø undersøkjer mediebransjen grundig. Mellom anna avslører han avsløringsjournalistikken og testar forbrukartestane. Eigen såpeopera har han òg.
Ein annan humorist, Knut Nærum, har illustrert boka med teikneseriar.
Syden. (2002) Are Kalvø har vore på oppdagingsferd i dette mystiske landet "Syden" som ingen riktig veit kor er. Etter djuptgåande granskingar kan Kalvø no slå fast at "det er ein annan plass." Pluss at ein finn ting som parasolldrinkar og grisefestar der. Og at tida står heilt, heilt stille. Same kor mykje raudvin ein drikk. Midt på dagen. Lydbok.

Harry. (1999) Dette er boka for deg som vil bli ein betre og meir sjølvmedviten Harry. Og for deg som vil vete kven han Harry er. Kalvø gjev deg harryens historie og eit oversyn over ulike harrykategoriar og harryaktivitetar. Kanskje vil du etter å ha lese boka bli overraska over kor mykje som eigentleg er harry utan at du visste det. Best å sjekke då, kanskje. 

Kunsten å vere neger. (2000) Typisk Kalvøsk satirebok om gjensidig framandfrykt mellom etniske nordmenn og nye landsmenn. Kalvø gjev mellom anna råd om korleis innvandrarar i Noreg bør te seg for ikkje å skremme eller skuffe oss som var her frå før. Samstundas åtvarar han dei fyrstnemnde om særdrag ved oss som dei bør vere obs på. Med boka kjem ein CD med songar som handlar om framandkulturelle.

                     

Nød. (2004) Dette er Are Kalvø si fyrste skjønnlitterære bok. Boka er skriven i ein lett, underhaldande stil, men i botnen ligg alvorlege tema som bistand og urettvis fordeling av ressursar.