Lite pinleg, sidan eg hadde som eit av mine nyttårsforsett å bli flinkare til... å ynskje folk godt nytt år...
No kan ein kanskje seie at det finst ei tid for alt, og at tida for nyttårsynske i 2011 er mildt overskride. Men då seier eg at eg ikkje er einig. Det er alltid tid for gode ynske.
Og...It's always Hug Time!
For å få litt schwung over nyttårsynsket mitt gjev eg ordet til teikneserien Mutts, som mange sikkert kjenner i norsk utgåve under namnet Pels og poter. Serien har mellom anna gått i Tommy og Tigern, og står for sjarmerande og uskuldig humor full av hjartevarme. Med enkle strekar og små underfundige poeng klarar skaparen Patrick McDonnell å formidle mykje klokskap og kvardagsfilosofi. Og ikkje minst vere morosam!
Serien er full av pussige, småsære dyrefigurar, men i sentrum står desse to krabatane:
Hunden Earl Og katten Mooch.
Earl elskar å bli klødd på magen, og ikkje minst er han nasegrus beundrar av eigaren sin Ozzie.
Katten Mooch er djupt forelska i ein liten, rosa sokk og har ein underleg talefeil som minnar om kreativ lesping. Båe to er glade i å ta livet med ro og fokusere på viktige ting som å kose, sove og ete.
Her kan du sjå heile figurgalleriet og ikkje minst døme på striper!
Og her får du ei snål ei som handlar nett om å ynskje godt nytt år litt på etterskot!
Fekk du lyst til å lese meir Mutts? Då har du fleire moglegheiter. Her kan du tinge deg abonnement på striper via den offisielle heimesida til serien. Og her kan du kjøpe teikneseriebok med Mutts frå Tronsmo bokhandel. (Berre på engelsk.)
Men det beste av alt er at du om ikkje lenge kan kome til Tokke bibliotek for å få Mutts på heimlån!
Me har Mutts-bøker i bestilling, og fyrstemann som melder si interesse får stå fyrst i lånekøa! Berre snakk med oss på biblioteket eller legg att ein kommentar her!
Patrick McDonnell har forresten òg skrive fleire nydelege små barnebøker med figurar frå Mutts, og den mest kjende er kanskje Hug Time. Ei søt lita sak, like eigna til å dåre vaksne som ungar! Med ein enkel, men viktig bodskap! Denne boka er òg i bestilling og vil snart bli mogleg å låne på Tokke bibliotek.
Medan du ventar kan du her høyre kunstnaren sjølv lese høgt frå boka og ikkje minst sjå dei flotte illustrasjonane:
Og her kan du gå inn og sjå alle teikneseriane me har til utlån. Her skulle det vere noko for kvar ein smak.
Myrkt, ljost, stutt, langt, nytt, gamalt, slemt, snilt, teit, kult, pynteleg, perverst... Har du forslag til andre biblioteket burde kjøpe inn? Bruk kommentarfeltet! Me ventar på dine ynske!
PS: No kan alle leggje att kommentar, og ikkje berre registrerte brukarar!!
Ingen kommentarer:
Legg inn en kommentar